狂牛兵穩袋1億7千萬獎金　捧埋盃仲「和味」

西班牙率先闖入歐國盃決賽，距離捧盃只係一步之遙，目前呢支狂牛兵團已經穩袋2025萬歐（約1億7千幾萬港元）嘅獎金，如果成功更加「和味」，每個球員最少可以有43萬5千歐元(約368萬港元)，真係可以開心放暑假。

今屆歐國盃嘅總獎金同上屆一樣，有3.3億歐元(27.885億港元)，24支打入決賽周嘅球隊都已袋走保底獎金925萬(7816萬港元)，若球隊小組出局都有50萬歐(約423萬港元)落袋。

球隊每晉一級都有獎金，愈踢愈勇嘅西班牙，嚟到決賽已經可以袋走500萬歐，累計已有2025萬，如果捧盃嘅冠軍獎金係800萬，加埋就有2825萬獎金。

其實，佢哋嘅收獲又點知咁少，呢筆只係賽會嘅獎金，如果加埋贊助商或者國家嘅獎勵，所得嘅獎勵更多。單憑呢筆獎金計算，如果西班牙最後捧盃，每個球員可以攞到43萬5千歐元，比起佢哋2012年奪冠多出10幾萬歐。