阿仙奴斟神秘德國國腳　利萊辛尼成大熱

英國傳媒早前報道，阿仙奴喺歐國盃期間斟洽一名德國國腳，不過為免影響德國比賽，有關球員身份一直保密。隨住德國出局，有消息指阿仙奴收購對象為拜仁慕尼黑翼鋒利萊辛尼，佢同阿迪達曾經喺曼城合作，今次有望再續前緣。

阿仙奴一直希望引入右翼，分擔布卡約沙卡嘅重任，利萊辛尼就成為目標。拜仁簽入米高奧利斯後，翼鋒位置有人滿之患，利萊辛尼成為套現目標，預計4,000萬歐元轉會費就有交易，最重要係利萊辛尼8年前效力曼城嗰陣，阿迪達就係曼城助教，而且重點教導利萊辛尼、史達寧等翼鋒。

利萊辛尼曾表示對阿迪達嘅欣賞：「我對阿迪達只有正面評價，由我哋合作開始，佢就不斷改進我嘅足球，話畀我知乜嘢做得好、乜嘢做得唔好，佢同哥迪奧拿成就今日嘅我。阿迪達依家教阿仙奴一樣好出色，風格同戰術非常明顯，佢係好好嘅教練。」