C朗一項數據暴跌　費Sir唔信佢踢下屆世盃

葡萄牙喺歐國盃8強出局，第6次參賽嘅C朗拿度宣布今屆係最後一屆，而2年後嘅世界盃仍未有定案，以葡萄牙領隊馬天尼斯對C朗嘅「忠誠」，39歲嘅C朗繼續代表葡萄牙唔係咩奇事。不過根據C朗今屆嘅參與比賽數據，顯示佢隨住年紀增長不斷下跌，再踢落去隨時衰收尾。

C朗今屆5場比賽全部正選，但冇入球之外，統計顯示佢90分鐘平均觸球次數唔夠30次，比2年前卡塔爾世盃嘅39次有明顯下跌。再睇番上屆歐國盃(2021年)，C朗90分鐘平均觸球次數達到47球，如果同C朗2006世盃嘅巔峰期相比(66次)，依家C朗參與次數暴跌超過一半。

2026年北美洲世盃嗰陣，C朗將會41歲，連佢昔日曼聯恩師費格遜都話唔預期會見到佢：「我想像唔到(C朗再踢世盃)，足球會變得更快同更體力化，而且前鋒嘅生存空間更細，同後防唔同，前鋒要喺高齡維持高水平會更加困難。」