養兵千日！屈堅斯4次掂波夠做英雄

英格蘭鋒線人才鼎盛，上季喺阿士東維拉攻入27球嘅奧尼屈堅斯，今屆賽事長坐冷板，不過養兵千日用在一時，今場對荷蘭佢喺最後9分鐘上陣，全場只有4次掂波，就射入歷史性嘅絕殺入球，佢賽後形容呢球係佢歷來「最佳射門」。

奧尼屈堅斯賽後興奮表示：「我唔識形容，入波後全個身體都好激動，跑去慶祝嗰陣所有嘢都好似慢動作咁，我完全唔想離開呢個球場。我從來未試過咁靚嘅射門，仲要係呢個咁重要嘅時刻。我上陣前同高爾彭馬講你會助攻畀我，當佢拎到個波我就做好準備。」

今場係奧尼屈堅斯今屆第2次上陣，之前只喺分組賽對丹麥後備上陣踢20分鐘，呢位28歲前鋒表示：「我呢幾個星期都等待緊呢刻，背後付出咗好多努力先至有今日，我哋一直受到好多批評，但最重要嘅係，我哋已經入咗決賽！」