哈利卡尼成淘汰賽之王　一個現象竟變C朗？

英格蘭近年一直靠王牌前鋒哈利卡尼數胡，呢位拜仁慕尼黑前鋒喺4強對荷蘭憑12碼入波，成為歐國盃史上淘汰賽最多入波球員。不過，即將31歲嘅哈利卡尼喺隊中作用逐漸式微，連續3場淘汰賽都被換走，有球迷更指佢成為「英格蘭C朗」，成為球隊負累嘅大牌必然正選。

哈利卡尼今屆6場比賽全部正選，今場嘅12碼係佢歷來第6個歐國盃淘汰賽入波，超越法國嘅基沙文(5球)成為歐國盃歷來淘汰賽士哥王。雖然入波破紀錄，但哈利卡尼今屆表現持續低迷，對上2場淘汰賽加埋只係掂波55次，今場雖然經常返中場拎波，但禁區內仍然冇啖好食，《每日郵報》評佢為英格蘭正選中第2低分球員。

事實上哈利卡尼喺隊中重要性明顯下降，英格蘭3場淘汰賽入面，都喺打和或落後情況下將佢換走，而球隊喺佢離場後又確實踢得更好，不過哈利卡尼就唔介意自己重要性下跌：「神奇嘅成就！我為每個球員同職員光榮。我哋一直講要做好準備，英格蘭係龐大球隊，每個人都準備好，就算只係5分鐘或者1分鐘，都有機會幫英格蘭捧盃。」