荷蘭慘！連續4次準決賽出局　未來仍光明

荷蘭喺今屆歐國盃前唔係太多人睇好，但佢哋奮力殺入4強，最終被英格蘭淘汰，再次成為國際大賽「悲情球隊」。荷蘭自1988年贏歐國盃冠軍後，之後曾經4次殺入4強，但全部未能晉級，領隊朗奴高文表示球隊仍然年輕，未來仍然一片光明。

荷蘭歷來出產唔少巨星，但喺國際大賽運氣麻麻，世界盃3次殺入決賽全部輸晒，喺歐國盃亦唔好得幾多，雖然88年曾經奪冠，但之後喺1992年、2000年、2004年同今屆4次打入準決賽，都未能夠再行前多一步。

荷蘭今場有沙維西蒙斯、華布根兩名21歲以下球員做正選，後備亦有謝利美費林邦、雲迪雲、伊恩馬特臣等可造之才，朗奴高文賽後表示：「我對個結局失望，但對未來好有信心，呢隊波可以踢得更好，亦有更多球員會加入，我哋已建立出一個緊密團隊，亦非常接近決賽，我以佢哋為榮。」