查理斯三世發文賀英格蘭　望球隊速戰速決

英格蘭打入歐國盃決賽之後，英國國王查理斯三世發文祝賀，但言語之間暗寸球隊經常補時入波，甚至需要加時、互射12碼，贏得太驚險會影響國民健康。

查理斯三世喺賀文之中話：「我同妻子、所有家人一齊向你哋表達最熱烈祝賀，你哋打入歐國盃決賽，同時向你哋送上踢決賽美好祝願，我想鼓勵你哋最後時刻入波，或者再次上演互射12碼之前，就取得勝利，咁樣可以大大舒緩全國人民嘅心跳及血壓，祝你哋好運，英格蘭。」

英格蘭晉級過程險象環生，16強對斯洛伐克，踢到補時扳平1比1，最後加時反勝2比1。去到8強同樣落後之下，逼和瑞士1比1，要靠互射12碼淘汰對手，加上上仗4強補時入波，反勝荷蘭2比1，連續3場令好多英格蘭球迷抹一額汗，所以查理斯三世希望英格蘭踢決賽可以速戰速決。