【官宣】祖記簽入卡夫蘭　下季意甲杜林兄弟大鬥法

意甲勁旅祖雲達斯正式宣布簽入尼斯中場卡夫蘭杜林，雙方簽約5年，轉會費為2,000萬歐元(約1.7億港元)，意味呢位23歲法國新星下季將會喺聯賽，同效力國際米蘭嘅哥哥馬古斯杜林正面交鋒。

卡夫蘭杜林簽約之後話加盟祖雲達斯係佢自細嘅夢想，因為爸爸杜林都曾經效力祖記：「當知道祖雲達斯要簽我，我第一時間就答應，童年時候睇爸爸為祖雲達斯比賽，仲記得當時伊巴謙莫域都係踢祖記，我嘅夢想就係加盟祖雲達斯，現時夢想成真，心情好激動、好開心。」

「老杜林」曾於1996至2006年喺意甲搵食，效力過帕爾馬同祖雲達斯，馬古斯杜林同卡夫蘭杜林都喺意大利出世，隨住卡夫蘭杜林加盟祖記，意味三父子最終都登陸意甲。

另外，祖雲達斯向翼鋒費達歷高基艾沙發出最後通牒，要求呢位26歲意大利國腳一係減薪續約，一係離隊，祖記願意以2,500萬歐元(約2.1億港元)出售呢位「星二代」。