【官宣】祖记签入卡夫兰　下季意甲杜林兄弟大斗法

意甲劲旅祖云达斯正式宣布签入尼斯中场卡夫兰杜林，双方签约5年，转会费为2,000万欧元(约1.7亿港元)，意味呢位23岁法国新星下季将会喺联赛，同效力国际米兰嘅哥哥马古斯杜林正面交锋。

卡夫兰杜林签约之后话加盟祖云达斯系佢自细嘅梦想，因为爸爸杜林都曾经效力祖记：“当知道祖云达斯要签我，我第一时间就答应，童年时候睇爸爸为祖云达斯比赛，仲记得当时伊巴谦莫域都系踢祖记，我嘅梦想就系加盟祖云达斯，现时梦想成真，心情好激动、好开心。”

“老杜林”曾于1996至2006年喺意甲搵食，效力过帕尔马同祖云达斯，马古斯杜林同卡夫兰杜林都喺意大利出世，随住卡夫兰杜林加盟祖记，意味三父子最终都登陆意甲。

另外，祖云达斯向翼锋费达历高基艾沙发出最后通牒，要求呢位26岁意大利国脚一系减薪续约，一系离队，祖记愿意以2,500万欧元(约2.1亿港元)出售呢位“星二代”。