美洲盃易踢？史卡朗尼：請歐洲隊嚟試下！

美洲盃同歐國盃進行得如火如荼，法國前鋒基利安麥巴比曾聲稱「歐國盃難贏過世界盃」，不過阿根廷領隊史卡朗尼就表示，美洲盃同歐國盃水平其實差唔多，更提出邀請歐洲球隊將來參加美洲盃一齊「較量！

史卡朗尼表示：「我唔認為歐國盃或者美洲盃比較難，歐國盃4強有幾隊名牌，亦係我哋喺世界盃遇過嘅對手，咁唔代表阿根廷踢歐國盃一定會奪冠。我認為兩個賽事水平差唔多，希望有一日會有歐洲球隊獲邀踢美洲盃，睇下個成績會係點，不過到時咪變咗世界盃？講到尾我覺得兩個賽事水平均等，呢個係我嘅睇法。」

美洲盃最初係南美國家盃，只係由南美洲球隊參賽，但90年代開始有北美洲球隊參加，就連亞洲嘅日本同卡塔爾都曾經獲邀參賽，已經愈嚟愈國際化，如果之後真係請歐洲球隊參加都唔會令人太意外。