寸王效應？麥斯明恩莫比尼去土超搵食

新球季費倫巴治搵咗「寸王」摩連奴執教，加上土耳其喺歐國盃表現大獲好評，令土超愈嚟愈熱鬧，近日再有猛將空降，分別係辛特麥斯明轉投費倫巴治，意甲前國腳射手恩莫比尼加盟比錫達斯。

27歲嘅辛特麥斯明去年離開紐卡素，轉赴沙特搵食，加盟吉達艾阿里，一季之後辛特麥斯明獲摩連奴號召，即將重返歐洲轉戰土超，據報吉達艾阿里已同意放人，以借用形式畀辛特麥斯明去跟摩dad打江山。

另邊廂，拉素主力射手恩莫比尼將會離開效力8個球季嘅藍鷹，轉戰土超，據報呢位34歲前鋒將會轉投比錫達斯，轉會費為300萬歐元(約2,500萬港元)，簽約兩年至2026年，加1年續約選項，恩莫比尼年薪為600萬歐元(約5,000萬港元)。