巴塞斟掂尼威　同耶馬雙翼齊飛

西班牙今屆歐國盃雙翼齊飛，右邊拉明耶馬，左邊尼高斯斯威廉斯，只差一步就征服歐洲，據報已經擁有拉明耶馬嘅巴塞隆拿，近日同「尼威」經理人達成協議，對方原則上同意加盟，稍後再同畢爾包傾轉會費。

「銀河艦隊」皇馬今季簽入基利安麥巴比，巴塞如果唔增兵嘅話，嚟緊幾年都冇運行，據報佢哋集中向西班牙國家隊埋手，尼高拉斯威廉斯係首要目標，新任主帥費歷克並已經同對方代表談判過，巴塞同時想簽埋丹尼爾奧莫，不過斟介尼威急切啲，奧莫可以慢慢傾。

經巴塞一番努力，已經同尼高拉斯威廉斯經理人達成原則性協議，原則上願意加盟，跟住落嚟就傾轉會費，巴塞仲有個問題就係資金唔多，又要符合財務條例，因此如果想增兵嘅話，就要出售主力，不過如果畀巴塞砌掂西班牙雙翼，未來幾年就有足夠實力同皇馬鍊過。