麥巴比着皇馬9號　下周二班拿貝亮相

皇馬免費簽入基利安麥巴比後一直保持低調，等到法國隊歐國盃4強出局，皇馬官網連發兩稿，先係公布麥巴比下周二喺巴拿貝球場亮相儀式，然後再公布新球季波衫同號碼，麥巴比將會着皇馬9號。

麥巴比嘅亮相儀式相當隆重，西班牙傳媒報道，皇馬視麥巴比為新一代9號主人，同以往多位皇馬9號巨星睇齊，包括上任主人賓施馬，最初加盟時着9號嘅C朗，同埋巴西「大哨」朗拿度。

到時皇馬會長皮里茲亦會亮相，宣布同麥巴比簽約5年，麥巴比先同球迷見面，接受球迷歡呼，然後召開記者會回答傳媒提問。

至於另一消息就係皇馬球員號碼有新改動，兩名防中卡馬雲加同甘亞文尼最新號碼係6號同14號，卻奧斯掛靴後，佢件8號戰衣由費達歷高華維迪繼承，至於佢原本件15號，就畀咗土耳其新星艾達古拿。