英足總派定心丸　修夫基將獲續約

英格蘭領隊修夫基嘅「悶蛋戰術」雖然遭到輿論批評，但佢率領球隊連續2屆歐國盃打入決賽，就獲得英格蘭足總管理層高度肯定，根據英國《每日郵報》爆料，無論「三獅兵團」能否捧今屆歐國盃冠軍，修夫基都會獲得續約，留任主帥之位。

修夫基將於今年12月約滿，曾經被指將於歐國盃結束後離任，甚至一度傳出曼聯計劃邀請佢執教。不過，隨住紅魔鬼已經同領隊坦哈格續約，修夫基成「魔」無望，幸好英格蘭進身今屆歐國盃決賽，令「修哥」可以保住飯碗。

最新消息指，歐國盃結束後，無論賽果如何，英足總都會同修夫基展開續約談判，希望佢最少繼續領軍多2年，協助球隊爭奪2026年世界盃。

不過，如果修夫基執意離開，英足總亦有人選接替佢，包括紐卡素領隊艾迪侯域，以及2位前車路士主帥樸達、普捷天奴。