舒克斯抵達曼市體測　紅魔今夏首簽誕生

荷蘭喺歐國盃4強出局之後，前鋒約舒亞舒克斯立即飛赴曼徹斯特，將前往曼聯卡寧頓訓練基地接受體測，如無意外，將會簽約5年，成為紅魔鬼今夏第一筆收購。

根據英國《太陽報》報道，約舒亞舒克斯現身曼徹斯特機場，並乘坐一部黑色私家車離開，預料將於周五(12日)稍後時間接受體測。

至於「轉會權威」記者羅曼諾(Fabrizio Romano)爆料，曼聯分3年向意甲球隊博洛尼亞支付4,000萬歐元(約3.4億港元)轉會費，數目等同約舒亞舒克斯原有合約解約金，呢位23歲射手將會同曼聯簽約5年，並有權延長多1年合約。

身高1米93嘅約舒亞舒克斯出身於拜仁慕尼黑青年軍，升上一隊之後，大部分時間被外借，2022年夏天正式轉投博洛尼亞，上季表現大勇，踢34場意甲射入11及4次助攻，並獲補選入荷蘭大軍名單，參加今屆歐國盃，但僅後備上陣2次。

荷蘭上場歐國盃輸波後，英格蘭中場明奈特別走去同約舒亞舒克斯傾咗一陣，率先同呢位未來曼聯隊友打招呼。