重返意甲　莫拉達同意加盟AC米蘭

西班牙前鋒艾華路莫拉達前途問題有定案，根據意大利傳媒爆料，呢位31歲馬德里體育會射手已經同意轉投AC米蘭，將簽約4年，意味佢闊別2年之後，將再次重返意甲比賽。

早於5月已經傳出艾華路莫拉達可能離開馬體會，加上佢解約金僅1,200萬歐元(約1億港元)，引起唔少球會關注。AC米蘭老將射手基奧特今夏離隊，加上收購博洛尼亞前鋒約舒亞舒克斯失敗，所以將目標轉移至艾華路莫拉達身上。

AC米蘭嘅代表同莫拉達經理人團隊近日談判後，取得重大突破，已經達成初步協議，艾華路莫拉達可以獲得一份500萬歐元(約4,200萬港元)年薪嘅4年合約，並有額外獎金。與此同時，AC米蘭會支付1,200萬歐元解約金畀馬體會。

艾華路莫拉達上季為馬體會各項賽事上陣48場入21球及5次助攻，今屆歐國盃有1球進帳，佢曾經2度效力祖雲達斯，合共上陣185場入59球，對於意甲絕不陌生。