未捧盃先興奮！英足總已籌備勝利巡遊

英格蘭將會同西班牙爭逐今屆歐國盃，力爭自1966年後首次捧起重要錦標，英國傳媒指，英足總已為上屆同樣闖入決賽嘅「三獅兵團」，籌備慶祝安排。

消息指如果英軍喺柏林成功捧盃，將會喺嚟緊嘅禮拜二（16日）安排佢哋喺倫敦街頭作巴士大巡遊，巡遊路線都已經落實，由倫敦市政廳開始，最後去到白金漢宮，跟住獲國王查理斯三世接見，接住再有皇家宴會，呢個部份就由本身係英格蘭足總主席嘅王儲威廉王子負責。

預計會有幾百萬群眾走到街頭一齊慶祝，過去英國曾於2012年奧運會，一班奧運英雄都試過勝利巡遊，但之後就無舉辦過類似活動。