英足總懸史上最高獎賞　奪冠獎金1.4億

英格蘭連續兩屆打入歐國盃決賽，周一凌晨將與西班牙爭冠軍，據報英足總出重獎金爭冠，捧盃獎金高達1,400萬鎊(約1.4億港元)，畀全隊攤分，係英足總開出史上最高獎金紀錄。

好多人話歐國盃難打過世盃，原來英足總都係咁諗，兩年前卡塔爾世盃，英足總曾懸賞1,300萬鎊奪冠獎金，而今屆歐國盃，英足總再將獎金推高到1,400萬鎊，高過世盃獎金，希望提升英格蘭球員士氣，將獎金攞到手。

對於英足總出重獎金，網民大讚英足總給力，認為有助三獅兵爭冠，始終西班牙係今屆表現最好嘅球隊，先後擊敗克羅地亞、意大利、德國、法國，不過歷史紀錄顯示，雙方過去27次交手，英格蘭取得14勝3和10負，成績稍佳，所以英格蘭心理上唔驚西班牙。