冰釋前嫌！辛祖獲坦哈格解凍回歸操練

曼聯今個夏天重新洗牌，去年同領隊坦哈格反面嘅查頓辛祖，冷戰10個月後終於冰釋前嫌，日前正式歸隊參加季前訓練，而且仲有得跟大隊一齊練波兼唔使食「孤獨飯」，有望隨曼聯參加季前美國之旅，曼聯前途重燃希望。

坦哈格同查頓辛祖上年9月反目，當時坦哈格喺輸畀阿仙奴後，公開批評查頓辛祖練波態度差，該英格蘭翼鋒隨即反擊，指控坦哈格係大話精，搵佢做代罪羔羊。查頓辛祖拒絕就言論道歉，結果被禁止入一隊更衣室、訓練場同飯堂，被排擠4個月後先外借多蒙特，雖然佢協助多蒙特殺入歐聯決賽，但因為人工同轉會費問題，多蒙特未能將佢買斷。

曼聯日前展開新球季備戰，查頓辛祖「意外」出現喺一隊訓練，英國傳媒指坦哈格同查頓辛祖會面後，兩人冰釋前嫌，查頓辛祖有望參加曼聯今個月美國之旅。報道指曼聯唔排除會再將查頓辛祖出售，但4,000萬鎊轉會費同25萬鎊周薪會係轉會最大障礙。