【官宣】老而彌堅　36歲莊尼伊雲斯續約1年

曼聯收購新中堅之前，率先宣布同防線老將莊尼伊雲斯續約1年，以免增兵計劃有閃失，影響人腳分配。呢位中堅即使已經36歲，但上季各項賽事仍然上陣30次，可以話係老而彌堅。

華拉尼離隊後，曼聯計劃簽入新中堅，目標人選包括荷蘭國腳馬菲斯迪歷特、愛華頓新星班夫韋迪，但仍未成事，增兵存在變數之下，同莊尼伊雲斯續約屬於明智之舉。呢位北愛爾蘭國腳續約後話：「好開心可以同曼聯續約1季，效力呢間偉大球會，總能夠感受球迷無限支持，令人覺得榮幸，上季奪得英足盃冠軍係難忘經歷，我知道球隊來季可以挑戰更多錦標。」

莊尼伊雲斯出身於曼聯青訓系統，其後曾效力西布朗、李斯特城，上年夏天自由身離開李斯特城，重返曼聯跟操，獲紅魔鬼挽留開出1年合約，原本只被視為後備，但曼聯上季防線有多位球員輪流受傷，令莊尼伊雲斯大派用場，上陣30次，多過另外2位中堅域陀連迪路夫、利辛度馬天尼斯，僅次於華拉尼(32次)、哈利馬古尼(31次)，證明佢仍然有心有力，值得續約。