復仇！高爾彭馬成西班牙公敵

西班牙同英格蘭喺歐國盃決賽碰頭，係兩隊史上首次喺國際大賽決賽爭冠，不過西班牙同英格蘭嘅小國腳上年已試過「埋牙」，英格蘭U21成功捧走歐國盃冠軍，不過高爾彭馬當時嘅挑釁慶祝，就令佢成為西班牙公敵，今場必定有仇報仇！

上年U21歐國盃決賽，高爾彭馬嘅罰球省中居迪斯鍾斯入網，協助英格蘭贏1比0捧盃，佢入波之後就去後備席挑釁慶祝，引發雙方衝突，有2個教練被趕出場。完場後高爾彭馬行為受到批評，連當時曼城隊友沙治奧高美斯都怒插：「西班牙球員肯定唔會咁冇品慶祝，而且佢已經唔係第1次，賽後亦冇好似佢嘅隊友咁道歉。」

高爾彭馬今次再鬥西班牙，對手陣容只有中場阿歷斯巴爾拿係上年U21成員，而佢亦係當時「聲討」高爾彭馬最熱烈嘅球員。據西班牙《阿斯報》報道，阿歷斯巴爾拿怒斥高爾彭馬冇體育精神同態度囂張，不過呢位22歲中場今屆只係試過2次後備上陣，決賽落場機會唔大，要報仇就要靠一班師兄幫手。