复仇！高尔彭马成西班牙公敌

西班牙同英格兰喺欧国杯决赛碰头，系两队史上首次喺国际大赛决赛争冠，不过西班牙同英格兰嘅小国脚上年已试过“埋牙”，英格兰U21成功捧走欧国杯冠军，不过高尔彭马当时嘅挑衅庆祝，就令佢成为西班牙公敌，今场必定有仇报仇！

上年U21欧国杯决赛，高尔彭马嘅罚球省中居迪斯锺斯入网，协助英格兰赢1比0捧杯，佢入波之后就去后备席挑衅庆祝，引发双方冲突，有2个教练被赶出场。完场后高尔彭马行为受到批评，连当时曼城队友沙治奥高美斯都怒插：“西班牙球员肯定唔会咁冇品庆祝，而且佢已经唔系第1次，赛后亦冇好似佢嘅队友咁道歉。”

高尔彭马今次再斗西班牙，对手阵容只有中场阿历斯巴尔拿系上年U21成员，而佢亦系当时“声讨”高尔彭马最热烈嘅球员。据西班牙《阿斯报》报道，阿历斯巴尔拿怒斥高尔彭马冇体育精神同态度嚣张，不过呢位22岁中场今届只系试过2次后备上阵，决赛落场机会唔大，要报仇就要靠一班师兄帮手。