金靴獎改例！哈利卡尼有着數

今屆歐國盃金靴獎爭奪形勢緊湊，依家有6個球員入3球並列第1位，根據歐洲足協之前做法，如果入球數字相同，會計算助攻嚟分勝負，不過歐洲協足日前澄清，今屆歐國盃金靴如果出現平手情況，會以「皆大歡喜」方式由球員瓜分，間接益咗哈利卡尼。

目前射手榜有6個球員有3球，分別係穆斯亞拿(德國)、丹尼爾奧莫(西班牙)、哈利卡尼(英格蘭)、米卡達捷(格魯吉亞)、加普(荷蘭)同艾雲舒蘭斯(斯洛伐克)，但只剩丹尼爾奧莫同哈利卡尼有份踢決賽，佢哋兩個自然被視為金靴獎大熱門。

根據過往做法，如果決賽後冇人超越3球，丹尼爾奧莫有2次助攻，將會擊敗0助攻嘅哈利卡尼成為金靴得主，上屆C朗拿度同柏德列舒希克都有5球，C朗就靠助攻數字贏1比0成功獲得金靴獎。不過歐洲足協證實今屆改變做法，入球數字相同就齊齊得獎。

丹尼爾奧莫表示：「金靴獎係一個動力，不過如果西班牙贏波捧盃，就算靠龍門入波我都咁開心，勝利先係最重要，當然我想會繼續努力爭取入波。」