金靴奖改例！哈利卡尼有着数

今届欧国杯金靴奖争夺形势紧凑，依家有6个球员入3球并列第1位，根据欧洲足协之前做法，如果入球数字相同，会计算助攻嚟分胜负，不过欧洲协足日前澄清，今届欧国杯金靴如果出现平手情况，会以“皆大欢喜”方式由球员瓜分，间接益咗哈利卡尼。

目前射手榜有6个球员有3球，分别系穆斯亚拿(德国)、丹尼尔奥莫(西班牙)、哈利卡尼(英格兰)、米卡达捷(格鲁吉亚)、加普(荷兰)同艾云舒兰斯(斯洛伐克)，但只剩丹尼尔奥莫同哈利卡尼有份踢决赛，佢哋两个自然被视为金靴奖大热门。

根据过往做法，如果决赛后冇人超越3球，丹尼尔奥莫有2次助攻，将会击败0助攻嘅哈利卡尼成为金靴得主，上届C朗拿度同柏德列舒希克都有5球，C朗就靠助攻数字赢1比0成功获得金靴奖。不过欧洲足协证实今届改变做法，入球数字相同就齐齐得奖。

丹尼尔奥莫表示：“金靴奖系一个动力，不过如果西班牙赢波捧杯，就算靠龙门入波我都咁开心，胜利先系最重要，当然我想会继续努力争取入波。”