“细恩”拒绝艾纳斯肥约　同国米续约至2026

意甲冠军国际米兰正式宣布同教练施蒙尼恩沙基续约至2026年夏天，呢位48岁少帅获得650万欧元(约5,540万港元)年薪，成为意甲最高薪主帅。早前沙特阿拉伯豪门艾纳斯向“细恩”开出2,000万欧元(约1.7亿港元)年薪，利诱佢加盟，但佢宁愿收取“低薪”，都唔去中东掘金。

施蒙尼恩沙基2021年夏天成为国际米兰主帅后，协助球队夺得6项锦标，包括1次意甲、2次意大利杯、3次意超杯冠军，并打入2023年欧联决赛，可惜不敌曼城。

“细恩”教波成绩彪炳，多支沙特豪门出重金力邀佢加盟，有C朗助阵嘅艾纳斯开出2,000万欧元年薪，但系“细恩”不为所动，最终接受国米提供嘅650万欧元年薪，比原本年薪多150万欧元，另外，如果国米成功卫冕意甲，佢可以获得200万欧元奖金。

施蒙尼恩沙基续约后话：“我非常高兴，并感谢球会管理层，感受到好似家人一样受到重视，我希望为球队创造一段辉煌历史。”“细恩”透露满意今夏增兵进度，因为已签入佢想要嘅3位球员，包括中场施连斯基、门将祖斯马天尼斯、前锋泰尼米。