簽完舒克斯　曼聯隨時簽埋艾雲東尼

曼聯順利簽入約舒亞舒克斯後，有機會簽入艾雲東尼。據報該28歲英格蘭國腳希望加盟曼聯，並已向賓福特表達意願，曼聯斟佢將會輕鬆好多。

正跟隨英格蘭準備歐國盃決賽嘅艾雲東尼，透過經理人向賓福特表達離隊意願，由於佢同賓福特僅餘下1年合約，賓福特極可能被逼放人，而且轉會費亦會減半，原本賓福特開價8,000萬鎊(約8億港元)，依家可能收半價，亦即4,000萬鎊(約4億港元)。

艾雲東尼曾因違規賭波被罰停賽8個月，今年初復出後保持水準，並入選英格蘭大軍，今屆歐國盃為「三獅兵團」兩度後備上陣，16強對斯洛伐克交出助攻畀哈利卡尼為球隊奠勝。

曼聯一直對艾雲東尼有興趣，並留意其動向，依家艾雲東尼主動提出加盟，相信曼聯好快有回應。