曼聯防線大執位　中堅新星投維拉利爾

曼聯近期喺轉會市場動作多多，荷蘭前鋒約舒亞舒克斯同中堅馬菲斯迪歷特接近加盟，球隊周六(13日)突然答應賣走中堅新星甘華拉，呢位19歲法國小將將加盟西甲球隊維拉利爾。

甘華拉係曼聯青訓產品，上季球隊大鬧中堅荒嗰陣獲領隊坦哈格提拔，各項賽事合共有13次上陣紀錄，表現獲得好評，不過佢同曼聯自剩1年合約，據報佢同坦哈格會面後，知道自己上陣機會唔會多，所以決定離隊。

維拉利爾會向曼聯支付550萬歐元轉會費，連浮動獎金條款最高費用可達1,150萬歐元，而且曼聯會加入回購條款。消息指曼聯夏天重建防線，除正收購馬菲斯迪歷特外，仲想再簽多1個中堅，加上原有嘅利辛度馬天尼斯、哈利馬古尼、域陀連迪路夫同啱啱續約嘅莊尼伊雲斯，甘華拉離隊亦係意料中事。