維拉5,000萬鎊簽奧拿拿　曼聯計劃被搞軭

英超轉會市場轉趨活躍，將會出戰歐聯嘅阿士東維拉突然重錘出擊，成功用5,000萬鎊收購愛華頓中場阿馬度奧拿拿，呢位比利時國腳將簽約5年。據報維拉今次收購，仲影響埋曼聯嘅轉會計劃，令佢哋收購班夫韋迪嘅行動失敗。

維拉早前出售巴西中場杜格拉斯雷斯去祖雲達斯，不過火速簽入巴克里同巴蘭尼治亞兩位中場補充，估唔到突然再斥巨資，簽入22歲嘅比利時國腳阿馬度奧拿拿，維拉本身已有泰利文斯同丹當斯卡兩位比利時球員，相信有助阿馬度奧拿拿適應。

維拉今次大手筆交易仲連累埋曼聯，據《紐約時報》報道，愛華頓賣走阿馬度奧拿拿後財政壓力大幅舒緩，所以唔需要賣走曼聯目標班夫韋迪套現，除非收到7,000萬鎊以上轉會費先會考慮。曼聯本來諗住趁愛華頓財政問題壓價，最新開價唔夠5,000萬鎊。