孫興民起孖！熱刺閉門熱身賽大勝7比2

英超勁旅熱刺備戰新球季全速開動，周日(14日)凌晨閉門熱身賽，喺訓練場以7比2大破英甲球會劍橋聯，南韓前鋒孫興民入2球狀態唔錯，另一前鋒比蘭莊臣更上演帽子戲法。

雖然歐國盃同美洲盃仲踢緊，不過熱刺只有基斯甸羅美路、雲迪雲、達古仙等少數球員有份踢較後階段比賽，今場閉門熱身賽強陣出擊，上半場憑比蘭莊臣(3球)同孫興民(2球)入波領先5比0，占士麥迪臣、比蘇馬、迪姆華拿、古路施夫斯基、柏度樸路等主將悉數上陣。

換邊後熱刺改用新人，2名新加盟球員艾治格雷同瑞典中場貝華爾都首度披甲，結果憑米奇摩亞以及迪姆華拿逼到對方擺烏龍，下半場踢成2比2，熱刺順利大勝7比2完場，為新球季打下強心針。