曼城提出加薪75%　望艾達臣留隊

沙特阿拉伯豪門艾納斯近期密斟曼城門將艾達臣摩拉斯，向呢位即將31歲巴西國腳開出90萬鎊(約900萬港元)周薪，利誘佢加盟，根據英國《太陽報》最新爆料，曼城亦使用「銀彈戰術」，提出加薪75%，希望艾達臣續約留隊。

早前有消息指艾納斯開出3,000萬鎊(約3億港元)轉會費收購艾達臣摩拉斯，並為佢提供一份90萬鎊周薪合約，令呢位鋼門難以拒絕。不過，曼城唔想出售呢位防線主力，願意加人工說服佢留隊，艾達臣摩拉斯現時周薪為10萬鎊，即使加薪75%，都係得17.5萬鎊(約175萬港元)，同艾納斯開出嘅人工，仍然有一大段距離。

據悉呢個薪酬數目已經係曼城出價上限，如果艾達臣摩拉斯唔接受，會方惟有出售佢。事實上，曼城上月已同後備門將史堤芬奧迪加續約至2026年夏天，可能係為艾達臣摩拉斯離隊做準備。

另外，曼城前鋒祖利安艾華利斯已拒絕續約，皆因呢位24歲阿根廷國腳不滿未能穩坐正選，希望轉投其他球會，爭取更多上陣時間。