伊蒂哈德聘請白蘭斯執教　「拯救」賓施馬

沙特阿拉伯豪門伊蒂哈德正式宣布聘請白蘭斯擔任教練，雙方簽約2年，呢位58歲法國名帥加盟後，或者可以說服同胞賓施馬專心留隊比賽，幫佢重拾顛峰狀態。

伊蒂哈德7月初炒咗阿根廷少帥馬些路加拿度，一度傳出會聘請前AC米蘭教練皮奧利領軍，但雙方傾唔掂數，會方轉斟白蘭斯，並達成協議，白蘭斯簽約2年，年薪達到1,000萬歐元(約8,500萬港元)，如果協助球隊奪得聯賽冠軍，可以再獲得800萬歐元(約6,800萬港元)獎金。

白蘭斯曾經率領波爾多、巴黎聖日耳門奪得法甲冠軍等多項錦標，亦執教過法國國家隊，佢擔任過卡塔爾球隊艾雷恩教練，對於去中東搵食並唔陌生。

伊蒂哈德重金聘請白蘭斯，除咗佢以往戰績輝煌之外，亦由於隊內有2位法國球星賓施馬、尼高路簡迪，大家同聲同氣，特別係賓施馬曾經同前2任教練紐奴、馬些路加拿度鬧不和，更傳出想離隊，白蘭斯領軍後，應該可以安撫呢位36歲射手留隊。

另外，白蘭斯打算簽入羅馬中場艾奧亞，進一步壯大法國勢力。