威廉斯「被轉會」巴塞　畢爾包炮轟西足總

西班牙翼鋒尼高拉斯威廉斯，喺今屆歐國盃成功彈起，近日盛傳呢位小將即將加盟巴塞隆拿，唔少記者都追問佢轉投巴塞嘅消息，畢爾包會長就大發雷霆，炮轟西班牙足總未有好好保護球員，喺決賽前掀起罵戰。

近日西班牙傳媒瘋傳尼高拉斯威廉斯接近落實加盟巴塞，畢爾包會長Uriarte發出強烈聲明：「威廉斯係效忠畢爾包嘅球員，但喺歐國盃期間受到連串轉會問題轟炸，西班牙足總未有履行保護球員嘅基本責任，令球員承受極大壓力，畢爾包喺運動上同財政上都有能力去保留陣中主力，包括威廉斯。」

對於畢爾包嘅指控，西班牙足總亦強力反擊：「西班牙足總對待威廉斯，同大軍入面其他25個球員一樣，佢近期面對嘅問題，係源於佢喺歐國盃展示出嘅好表現同高水平，而唔係西班牙足總對待球員有差別而造成。」據報尼高拉斯威廉斯合約內有5,800萬歐元解約條款，巴塞隆拿視佢為夏天收購頭號目標。