世界變　互射12碼英格蘭更勝西班牙？

歐國盃決賽西班牙對英格蘭，雙方今屆都未輸過，「三獅兵團」防守力強，今場隨時需要互射12碼分勝負。根據以往經驗，英格蘭大賽互射12碼成績差劣，但8強對瑞士已打破魔咒，反觀西班牙近年大賽互射12碼表現欠佳，未必有着數。

根據統計，英格蘭曾經11次需要互射12碼分勝負，只有4次勝出，但要留意其中1次係1996年歐國盃射贏西班牙，「三獅兵團」今屆8強互射12碼淘汰瑞士，打破28年互射12碼不勝魔咒，有助提升球員主射信心。

至於西班牙有13次互射12碼，贏咗7次，勝出率明顯高過英格蘭，但係「鬥牛兵團」近年大賽互射12碼，經常失利，包括2018年世界盃16強射輸畀俄羅斯，上屆世界盃16強射輸畀摩洛哥，上屆歐國盃4強射輸畀意大利，總結西班牙近4次大賽互射12碼輸3次，僅於上屆歐國盃8強射贏瑞士，如果今場決賽需要互射12碼，西班牙球員心理上可能輸蝕。