一夫當關！修夫基28年前「零封」西班牙

周一(15日)凌晨將上演歐國盃決賽西班牙大戰英格蘭，兩隊對上一次喺歐國盃交鋒已經係1996年8強，現任「三獅兵團」領隊修夫基當年以正選中堅身份，踢足120分鐘，協助球隊打和0比0，並憑互射12碼淘汰西班牙，相隔28年，修夫基已貴為英格蘭主帥，有信心重演好戲再次擊敗西班牙。

修夫基喺記者會講番1996年場波：「我當時踢得幾好，打和0比0，對於後衞來講，已經算唔錯，我哋該仗憑互射12碼晉級，對方球員拿度令我留下深刻印象。」修夫基口中嘅拿度係西班牙後衞，當年第4輪互射12碼宴客，令英格蘭得以晉級，修夫基可能因此特別記得佢。

英格蘭當年對西班牙，修夫基並冇份主射12碼，但4強對德國，佢操刀成為唯一射失球員，慘成出局罪人。