兩代球王暗戰　比寧咸美斯隔空爭金球獎

周一(15日)凌晨踢完歐國盃決賽西班牙對英格蘭之後，緊接上演美洲國家盃決賽阿根廷對哥倫比亞，兩場大戰勝負，好可能直接決定今年金球獎，到底屬於英格蘭新星祖迪比寧咸，抑或阿根廷球王美斯。

由於雲尼斯奧斯祖利亞、基利安麥巴比、卻奧斯等幾位金球獎熱門人選今夏國際賽表現欠佳，今年金球獎已成為祖迪比寧咸同美斯之爭。年僅21歲嘅比寧咸上季為皇馬各項賽事，上陣42場入23球，協助球隊奪得西甲及歐聯冠軍，球會成績近乎完美，如果可以幫英格蘭贏埋歐國盃冠軍，相信金球獎及世界足球先生殊榮非佢莫屬。

不過，一旦英格蘭輸波，而阿根廷成功衞冕美洲國家盃，37歲美斯就有機會蟬聯金球獎，畢竟佢一向有「球王光環」加持，例如2021年羅拔利雲度夫斯基演出搶鏡，但仍然屈居美斯之下，失落金球獎，引起唔少爭議，因此，即使美斯已去美職搵食，但只要有大賽冠軍落袋，仍然有好大可能獲得金球獎。