英格蘭再歷悲情決賽　哈利卡尼無冠魔咒延續

英格蘭繼3年前歐國盃決賽互射12碼輸畀意大利後，今屆決賽又被西班牙絕殺輸波，成為歐國盃史上首支連續2屆決賽飲恨球隊。從未贏過任何錦標嘅哈利卡尼，足球生涯踢過7支球隊、超過600場比賽同400個入波、78次衝擊錦標、6場決賽，拎過英超、德甲、世界盃、歐國盃金靴獎，但通通換唔到一面冠軍獎牌，哈利卡尼表示今場係「足球最痛」。

哈利卡尼喺決賽表現差勁，60分鐘英格蘭首個換人就係將佢換走，佢返到後備席後表現極度沮喪，最終英格蘭完場前輸波，令哈利卡尼無冠魔咒延續。哈利卡尼賽後表示：「今屆賽事好困難，我哋打入決賽已經好好，但決賽係決定一切，依家感覺只剩巨大嘅失望，足球場上最痛苦莫過於此。」

30歲嘅哈利卡利今屆以3個入球，同另外5名球員並列神射手，但球隊榮耀就同佢絕緣，效力熱刺期間喺2場英聯盃決賽同1場歐聯決賽落敗，上年加盟德甲11連冠嘅拜仁慕尼黑，聯賽冠軍即告斷纜，加上連續2屆歐國盃決賽飲恨，哈利卡利絕對係足球場上最悲情人物之一。