英格兰再历悲情决赛　哈利卡尼无冠魔咒延续

英格兰继3年前欧国杯决赛互射12码输畀意大利后，今届决赛又被西班牙绝杀输波，成为欧国杯史上首支连续2届决赛饮恨球队。从未赢过任何锦标嘅哈利卡尼，足球生涯踢过7支球队、超过600场比赛同400个入波、78次冲击锦标、6场决赛，拎过英超、德甲、世界杯、欧国杯金靴奖，但通通换唔到一面冠军奖牌，哈利卡尼表示今场系“足球最痛”。

哈利卡尼喺决赛表现差劲，60分钟英格兰首个换人就系将佢换走，佢返到后备席后表现极度沮丧，最终英格兰完场前输波，令哈利卡尼无冠魔咒延续。哈利卡尼赛后表示：“今届赛事好困难，我哋打入决赛已经好好，但决赛系决定一切，依家感觉只剩巨大嘅失望，足球场上最痛苦莫过于此。”

30岁嘅哈利卡利今届以3个入球，同另外5名球员并列神射手，但球队荣耀就同佢绝缘，效力热刺期间喺2场英联杯决赛同1场欧联决赛落败，上年加盟德甲11连冠嘅拜仁慕尼黑，联赛冠军即告断缆，加上连续2届欧国杯决赛饮恨，哈利卡利绝对系足球场上最悲情人物之一。