復興狂牛！富安迪實現歐國盃大滿貫

西班牙2年前喺世界盃16強出局，唔少球迷預計佢哋將進入一段低潮期，但U23主帥富安迪獲提升接替安歷基後，成功為「狂牛兵團」注入新力量。富安迪曾率西班牙贏過U19歐國盃、U21歐國盃冠軍，今次帶領子弟兵再度稱霸歐洲，成功實現「歐國盃大滿貫」。

63歲嘅富安迪過去10年都為西班牙青訓工作，2015年帶領西班牙贏U19歐國盃冠軍，2019年再為西班牙贏埋U21歐國盃冠軍，好似洛迪卡斯簡迪就係當年U19冠軍主力；法比安彭拿、丹尼爾奧莫更加係U21歐國盃決賽入球功臣，而米基爾馬連奴更係3場決賽都有份落場，而且富安迪慧眼重用拉明耶馬同尼高拉斯威廉斯2大新星，係復興西班牙嘅最大功臣。

富安迪賽後表示：「我為呢班偉大球員感到光榮，依家係享受嘅時間，我哋實現咗一啲好難達到嘅成就，大家都非常開心，好快我哋就要着眼未來，因為呢個團隊非常有野心，佢哋想繼繼續贏更多嘅冠軍。」