修夫基拒談去向　決賽輸波仍有望封爵

英格蘭連續2屆歐國盃決賽輸，領隊修夫基嘅保守踢法受到唔少批評，佢同英格蘭足總合約今年底完結，盛傳將會結束8年國家隊領軍生涯。有消息指修夫基雖然未能為英格蘭捧盃，仍然有機會獲封爵表揚佢對國家隊嘅貢獻。

修夫基執教英格蘭8年，2屆歐國盃都拎到亞軍，喺2018年世盃亦打入4強，成績唔算太差，不過佢今屆排陣同戰術受到批評，博彩公司已將樸達列為下任領隊大熱。對於去留問題，修夫基賽後表示：「我覺得依家唔係做決定嘅合適時間，我會同相關人士商討，但唔係依家。」

據英國《每日電訊報》報道，英格蘭如果贏冠軍，修夫基肯定會獲封爵，即使依家未能奪冠，2019年已獲頒OBE嘅修夫基，有望得到更高勳章，正式成為「修爵」。