洛迪受傷照當選MVP　有望問鼎金球獎

西班牙中場洛迪卡斯簡迪雖然喺歐國盃決賽踢完上半場傷出，但無阻佢當選今屆賽事最佳球員，加上協助曼城捧上季英超冠軍，備受睇好有力問鼎今年金球獎。

洛迪卡斯簡迪今屆有6場比賽擔任正選，合共踢咗521分鐘，16強對格魯吉亞，射入扳平1球。呢位28歲防守中場攔截能力強之外，傳球接駁工作亦有重要貢獻，今屆作出439次傳波，有411次成功交畀隊友，傳球成功率近93%，對於「鬥牛兵團」轉守為攻發揮重要作用。

洛迪卡斯簡迪攞獎後話：「我哋成為歐洲冠軍，可能係我球員生涯最佳日子，我哋擁有最成功國家隊、最輝煌歷史。」洛迪亦成為歐國盃1996年正式設立最佳球員獎項以來，第3位獲此殊榮嘅西班牙球員，另外2位分別為2008年沙維、2012年恩尼斯達。

隨住洛迪卡斯簡迪協助西班牙奪得歐國盃冠軍，兼當選最佳球員，大大拉近同美斯、祖迪比寧咸、基利安麥巴比嘅距離，有機會贏埋今年金球獎。