「毒瘤」古古列拿爭氣　孖女友寸爆加利仔

西班牙喺歐國盃決賽對英格蘭前，英格蘭名將加利尼維利直指西班牙左閘古古列拿係「毒瘤」，將會係西班牙拎唔到冠軍嘅關鍵，結果加利仔慘成「烏鴉嘴」，西班牙嘅致勝入波就係由古古列拿助攻，呢位車路士球星同佢女友賽後齊齊大反擊，寸爆加利仔！

加利仔喺決賽前表示：「古古列拿喺車路士表現麻麻，佢個轉會費都依家都令人覺得震驚，西班牙防線好有經驗，但就係爭少少先可以令人覺得佢哋會贏到最尾，古古列拿做左閘就係人哋有呢個諗法嘅原因。」

諷刺嘅係，古古列拿完場前交出精彩助攻，畀奧耶沙巴爾攻入決定性一球，佢完場後就喺社交網發言大反擊：「我哋贏到最尾呀加利仔，多謝你嘅支持！」女朋友Claudia Rodriguez亦貼出兩人拎住獎盃錫錫嘅相，問加利仔：「你今晚過得點呀？」