莫拉達即將重返意甲　改投A米

剛以隊長身份為西班牙捧走歐國盃嘅艾華路莫拉達，球員生涯即將開新篇，據報在決賽期間，呢位31歲射手同AC米蘭達成協議，最快一星期內完成交易，重返意甲。

艾華路莫拉達喺馬體會只係表面風光，實際上持續遭受惡評攻擊，令佢早有離隊念頭，期間曾有沙特球會開出巨額合約，兩年合約年薪高達1,800萬歐元招攬佢去中東搵食，但考慮到家人生活問題婉拒。

莫拉達又曾向前球會祖雲達斯查詢回巢可能性，但新帥莫達又睇唔上佢，莫拉達唯有「跪地餼豬乸」向馬體會表忠，希望自己將來唔會過得太艱難，直至歐國盃決賽前，AC米蘭提出斟介，結果一拍即合。

「紅黑軍團」誠意十足，將會向馬體會支付1,300萬歐元(約1.1億港元)解約金，向莫拉達開出4年合約，年薪500萬歐元(約4,200萬港元)，預計今個星期就會進行體檢，然後完成交易。