曼聯災難性表現　坦哈格咁回應

曼聯踢首場季前熱身賽，0比1不敵洛辛堡，全場捱打，如非對手4次射中柱楣唔入，恐怕紅魔鬼隨時被大炒。賽後領隊坦哈格批評球員比賽態度欠佳，水準遠低於正常水平，但同時指洛辛堡踢法粗野，多次作出肉酸犯規，可能令紅魔鬼球員有顧忌，為免受傷而有所「錫身」。

坦哈格話：「雖然係熱身賽，但勝負都好重要，以曼聯嘅標準，絕對唔可以輸，我哋踢得唔夠好，遠低於正常水準，完全唔似頂級聯賽球隊，我明白球員剛開操，狀態唔可以同對手相提並論，畢竟挪超進行得如火如荼，洛辛堡已踢14場聯賽，當然我哋係曼聯，應該表現好啲，但上半場對手太多粗野犯，情況實在唔理想。」

曼聯今場只有5次射門，反觀洛辛堡多達22次，可見兩隊表現有天壤之別。