曼城開操　多位主將獲延長假期

上季英超冠軍曼城開操，但多位有份出戰歐國盃或美洲盃球員，仍然未歸隊，根據英國傳媒爆料，「藍月亮」領隊哥迪奧拿批准呢班國腳延長假期至起碼8月5日，意味佢哋將會喺冇參加季前熱身賽情況下，直接出戰8月10日晚上社區盾對曼聯。

據悉獲得延長假期嘅球員包括2位比利時國腳奇雲迪布尼、謝利美杜古、2位葡萄牙國腳貝拿度施華、魯賓戴亞斯、瑞士中堅文路爾艾簡治、荷蘭中堅尼敦阿基，6人將於8月5日歸隊。

至於有份為踢歐國盃決賽嘅洛迪卡斯簡迪、菲爾科頓、史東斯、基爾獲加，以及為阿根廷踢美洲盃決賽嘅祖利安艾華利斯，仍然未有歸期，哥迪奧拿將會同4人討論歸隊時間，佢哋可能錯過季初部分比賽。

至於冇份踢國際賽嘅艾寧夏蘭特、基亞利殊等人已經歸隊操練，夏蘭特上載操練相片到社交網，佢可能餓波太耐，心情非常興奮。