【官宣】帕爾馬簽「日本奧拿拿」做保方接班人

帕爾馬來季重返意甲，近期積極增兵，宣布簽入21歲日本門將鈴木彩艷，總轉會費達1,000萬歐元(約8,500萬港元)，雙方簽約5年。傳奇門將保方上年退休之後，帕爾馬缺乏1位可靠門將，鈴木彩艷新一季有望擔正。

鈴木彩艷喺日職球隊浦和紅鑽出道，上年夏天被外借去比甲球隊聖圖爾登，上季聯賽上陣32場。聖圖爾登今年7月1日正式用400萬歐元買斷佢，現時以750萬歐元固定轉會費及250萬歐元浮動轉會費，將鈴木彩艷轉售畀帕爾馬，唔夠1個月已賺超過1倍。

呢位身高1米90嘅天才門將早已吸引多間大球會注意，包括曾傳出曼聯有意簽入佢，加上鈴木彩艷擁有非洲加納血統，亦曾犯低級失誤，因而被網民稱為「日本奧拿拿」。鈴木彩艷至今為日本國家隊上陣10次，佢之前表示，希望「由低做起」，認為效力細球會可以有更多上陣機會，暫時無意登入豪門。