奧巴美揚去中東掘金　加盟沙特新升班球隊

沙特阿拉伯再迎來1位球星，根據「轉會權威」記者羅曼諾(Fabrizio Romano)爆料，前阿仙奴射手奧巴美揚已經同意加盟沙特新升班球隊艾卡迪沙，雙方將簽約2年，同今夏來投嘅前皇馬隊長拿祖費南迪斯做隊友。

現年35歲嘅奧巴美揚曾效力多蒙特、阿仙奴、巴塞隆拿、車路士、馬賽等球隊，並獲得2018/19年球季英超神射手，呢位加蓬名將上季為馬賽各項賽事上陣51場入30球及11次助攻，可以話係寶刀未老。

據悉艾卡迪沙向奧巴美揚開出巨額薪酬，令佢無法拒絕，所以向馬賽提出離隊要求。馬賽亦同意放人，只要同艾卡迪沙達成轉會費協議，交易就可以成事。

艾卡迪沙雖然係新升班球隊，但財大氣粗，現時由皇馬名宿米高執教，早前已宣布簽入比利時國家隊正選門將卡斯迪爾斯，以及協助西班牙捧歐國盃冠軍嘅中堅拿祖費南迪斯，加埋奧巴美揚，令球隊攻守能力大增。