麥巴比巴拿貝亮相　施丹老佛爺出席

皇馬周二(16日)舉行盛大歡迎儀式，宣布法國前鋒基利安麥巴比加盟，會長「老佛爺」皮里茲及名宿兼前主帥施丹出席，皇馬主場巴拿貝球場全場爆滿，歡迎「麥總」正式「上艦」。

今次歡迎儀式，有一系列活動同手續要做，包括先做身體檢查，完成之後就同皮里茲一齊舉行簽約儀式，麥巴比係以自由身加盟，簽約5年，據報皇馬支付巨額簽字費及肖像權，期間參觀皇馬更衣室，其中一個衣櫃已經印上麥巴比名字同9號。

麥巴比自小有個「兒皇夢」，今次並非佢首次到訪皇馬，早在2012年「麥總」曾到皇馬試腳，由時任青訓教頭施丹親自迎接，不過麥巴比並未留低，皇馬曾於2017年及2022年兩度邀請麥巴比加盟，但被拒絕，嚟到2024年終於正式加盟。

麥巴比生涯至今已經完成多項成就，包括贏得世盃冠軍同世盃金靴獎，佢仲有5大目標將會在皇馬期間完成，分別係歐聯冠軍、金球獎、世界足球先生、歐洲金靴獎，以及歐國盃冠軍。