英格蘭搵臨時工頂住　等緊哥迪奧拿？

英格蘭周二(16日)宣布修夫基辭任領隊一職，新帥人選眾說紛紜，艾迪侯域、樸達等英籍領隊被視為熱門人選，不過有消息指英格蘭足總唔抗拒搵外籍領隊，哥迪奧拿同高普都係目標之一，甚至願意等待2大名帥接手，暫時由U21領隊卡斯利頂住主帥一職。

英國《獨立報》報道，哥迪奧拿盛傳會喺明年約滿後離開曼城，英格蘭足總視佢為下任領隊最佳人選，西班牙籍嘅哥迪奧拿過去曾經表示，願意嘗試做國家隊主帥(當時講緊巴西國家隊)，如果佢決定明年「轉工」，英格蘭足總願意等待。

除咗哥迪奧拿之外，正休息嘅前利物浦領隊高普亦會喺明年出山，呢位德國領隊同樣係英格蘭足總心儀人選，所以佢哋正考慮先搵看守領隊「頂住先」，U21主帥卡斯利好大機會喺9月份，帶領英格蘭出戰歐國聯賽事。