狼隊友賽爆歧視風波　黃喜燦「當自己係成龍」

正喺西班牙進行集訓嘅狼隊，周三(16日)凌晨友賽意甲嘅科木，爆出種族歧視風波。據報狼隊嘅南韓前鋒黃喜燦投訴受到種族歧視，兩隊球員之後更爆出衝突，科木隨後發聲明回應，承認有球員指黃喜燦「當自己係成龍」，但當中冇任何種族歧視成份。

狼隊喺呢場閉門熱身賽贏1比0，爭議事件發生喺下半場中段，黃喜燦投訴受到對手種族歧視，領隊加利奧尼爾賽後表示一度打算拉隊離場，但黃喜燦就堅持完成比賽。報道指喺黃喜燦投訴後，雙方球員曾經發生衝突，狼隊球員普丹斯被逐離場。

新升班意甲嘅科木賽後發聲明解釋事件，反指狼隊反應過激。科木證實涉事球員當時同隊友講：「唔好理佢，佢當自己係成龍(Jackie Chan)。」球員只係借黃喜燦(Hwang Hee-chan)嘅花名「Channy」作出回應，當中冇任何種族歧視或貶低嘅含意，更批評狼隊球員反應過敏、小事化大。