盧卡古答應投拿玻里　要等1個人先轉會

近年成為「人球」嘅比利時前鋒盧卡古，據報已答應加盟意甲勁旅拿玻里，合約同轉會費都已經傾好晒，不過要實正落實仲有關鍵一步，就係要等拿玻里成功賣走域陀奧森漢。

尼日利亞前鋒域陀奧森漢已表明離隊意願，不過拿玻里超過1億歐元叫價，就令一眾豪門卻步，普遍預期拿玻里喺轉會市場較後時間會「減價」，而呢間意甲球會亦做好準備，傾掂盧卡古做接班人。

盧卡古近2季分別被車路士外借去國際米蘭同羅馬，雖然合約內有4,400萬歐元解約條款，但車路士亦想盡早甩手，將答應拿玻里2,500萬歐元開價，盧卡古為同前領隊干地再合作，亦願意減薪加盟。

據報域陀奧森漢受到巴黎聖日耳門、阿仙奴同車路士等球會垂青，呢位尼日利亞射手近3季為拿玻里入66球，被視為歐洲聯賽最佳前鋒之一。